Dahil sa holdap experience ko at sa tindi ng pangangailangan, sinubukan kong mag pollwatch noong eleksyon. Pagkatapos kong bumoto, isinama ako ng isang katrabaho sa District 2 ng Quezon City sa Area 11 ng kandidatong si Jun Simon. Dating Mayor ng QC si Simon at tumakbo siya bilang Kongresman sa ilalim ng tiket ng Genuine Opposition. Nakalaban niya sina Annie Susano, Dante Liban at Chuck Mathay, na sinuportahan ng administrasyon.
Assistant Polling Precint Coordinator ang trabaho noong May 14. Trabaho ng APPC na tiyakin na may pagkain, tubig at gamit ang mga pollwatchers. Kailangan rin namin siguraduhin na makukuha ang election returns at initial reports para sa pag-tally ng boto.
In short, napagod, napuyat at nagutom kami (kasama ang iba pang coordinators at pollwatchers) sa maghapon at magdamag na pagbabantay at pagbibilang ng boto pero hanggang ngayon, hindi pa kami binabayaran ng kandidato.
Talo si Simon. At wala nang balak magbayad sa mga watcher niya. Ang alibi niya, mga volunteers lang daw kami at hindi siya nangako ng bayad.
Meron ba namang watcher na papayag magpagod at magpuyat para sa wala. Mabuti na lang nga at may pumayag pang mag watcher para sa kanya? Wala.
Kaya ang isa pang aral na natutunan ko sa kakaibang karanasan bilang poll watcher – mag-ingat sa mga balasubas na kandidato. Marami sila at nakaupo sa pwesto.
